top of page
搜尋

【市場小姐有話兒 – 中港聯手】

市場小姐有話兒 – 中港聯手



市場小姐:喂,隔左成個禮拜,你講得未?到底中國是否再次開放市場經濟?


佛系男:咁你諗左成個星期又諗到啲咩呀?


市場小姐:似曾曾咁囉,早兩日官媒出聲呀,話『有錢才能消費、才敢消費』,仲話呀『讓居民通過股票、基金等渠道也能賺到錢,從而化消費意願為消費能力。從這個角度來說,發揮好資本市場的作用,是恢復和擴大消費的必要之舉。』


佛系男:所以你就覺得中國真係要撤底轉向了?


市場小姐:妖,呢個我米問緊你囉。不過,都講得咁露骨了,應該無假架啦?


佛系男:正如我上星期所講:『市值低、氣氛差,仲講乜信心?』。此刻中國經濟增長難以再靠固定投資、城市建設、製造出口,房住不炒及內房爆煲的慘況仍猶有餘悸,咁仲可以靠乜?米唯有靠手頭現金滿瀉的平台企業、境外公司,一方面重新增聘人手、減輕內地的失業壓力,另一方面用真金白銀提振股市,希望靠股市創造財富效應囉。呢一招,美國一直用緊。


市場小姐:下?大陸想學美國?


佛系男:唔出奇呀。大陸好多野都係學美國架啦。而且,早於今年6月,中國人民大學國家發展與戰略所教授劉曉光就撰文點出,中國經濟的五個20%痛點,更建議中國政府以直昇機派錢方式鼓勵消費,米又係抄美國。


市場小姐:咁米好囉,橫掂都係共產架啦。派錢好呀!


佛系男:不過,如果大陸真係直昇機派錢,咁長期前景可能更不樂觀。


市場小姐:何解?


佛系男:美國可以無限發債,中國就學唔到。直昇機派錢這種方式,對中國來說還早了二十年。如果中國行使這種「不負責任」的無償財政政策,咁佢仲有乜藉口鬧美國無賴?人民幣的國際信心要承受好大風險架。況且,我米講左,中國人唔係無錢,不過,就算有錢都寧願運出國用之麻。


市場小姐:咁你覺得今次官媒出到聲,能唔能夠成功提振股市呢?


佛系男:何止官媒出聲?香港公營機構都幫到出面了。先有港交所免除上市公司披露中國風險的要求,後有恒指公司高調宣佈中國科技指數進入牛市。中港兩地的官方力量已經聯成一線要托市。能否成功?我答唔到你。不過睇歷史,短暫獲得成功的機會唔細。


市場小姐:咁似乎中港股有運行。但咁到底中國係米再次開放市場經濟呢?


佛系男:我都希望中港股有運呀,否則我地好快要降低生活水平。至於中國是否再次開放市場經濟呢個問題,你睇一件事就知。


市場小姐:咩事?


佛系男:近日中國政府又出台「限遊令」啦,好似我咁,做乜都畀你限住哂,你任我賺錢,但限我用途,我一切活動、喜好都受你一個人獨裁管治,咁算唔算係開放市場丫?當你唔存在時,我米有機會恢復開放市場囉!不過,呢刻有錢賺,就係人都會賺既!人性係貪婪架。


市場小姐:又兜個圈燒我!#%!&$


349 次查看0 則留言

Comments


bottom of page