top of page
搜尋

【市場小姐有話兒 – 夜市】

【市場小姐有話兒 – 夜市】



佛系男:有時睇新聞都真係愈睇愈勞氣。


市場小姐:又想發咩牢騷呀?


佛系男:陳茂波提倡話香港搞夜市,以此振興旅遊、經濟,其實呢條友識唔識經濟架?


市場小姐:搞夜市唔好咩?半夜落街拮串魚蛋都好丫。而且,國家都搞緊地攤經濟,你都話香港正在二次回歸,緊跟大陸玩地攤檔好正常丫!


佛系男:國家搞地攤經濟呢,個原意係畀個體戶可以靠自己維持生計,係一個低門檻的創業途徑,又可以纾緩失業。香港搞地攤經濟就唔同啦,首先,你覺得香港政府真係會任得你隨便推架車仔就開檔?肯定會有好多申請步驟、要求、門檻,到最後可以開到檔既人好可能都係而家領展果班集團背景的偽小店,又或者好似美食車咁囉,氹左班壽頭落搭後,然後在營運上諸多制約,最後位位蝕一百幾十萬認輸離場。


市場小姐:或者今次唔同呢?


佛系男:咁首先我地要理解下政府個初心。香港90年代前,小販生意養大好多兩代人。後來,港府呢樣禁果樣禁,好多低下階層再唔能夠推架車仔搵兩餐,最後就被迫收取最低工資去政府啲外判清潔公司打工。如果政府本意係等人人可創業,咁低下階層勞動力短缺,咁呢批外判公司米要高價搶人?需知做政府生意的外判公司同政府高層關係千絲萬縷,政府又點會去搞呢個既得利益集團。相反,我估計因為搞夜市,政府就有藉口提高外判清潔成本的預算,又係肥自己人的機會。


其次,你諗下,如果呢個地攤經濟係為左搞夜市,好多野要配合架,諗番你細個果陣丫。熟食檔一般會係車站、戲院旁邊,大家睇完午夜場就食串牛雜。咁呢個夜市要擺係邊度,有乜其他措施配合?最簡單,你估香港無夜市咩?近年廟街都愈來愈早收檔,歸根究底係無人行呀。而且,如果得個夜市可以做,若然夜晚無生意,日頭又唔畀開工,點圍皮呀?


市場小姐:下?我細個時已經無乜小販啦,我地有年紀有條鴻溝架。


佛系男:咁我問你丫,夜晚11點,你會寧願留係屋企坐係梳化食雪糕,定係落去夜市丫?


市場小姐:咁我就梗係留係屋企啦。


佛系男:係囉,如果你咁夜落去又會被遊客誤會架。因為夜市仲有一個特色,除左戲院外,仲必定有一樣娛樂配合,夜市地點必定會有雞叫。如果香港政府想多D遊客來?參考下曼谷的Khao San路啦。我相信政府無得否認曼谷搞旅遊、搞夜市係高好多班。


市場小姐:睇黎你好想去曼谷喎。


佛系男:香港人都鍾意去泰國。

205 次查看0 則留言

コメント


bottom of page