top of page
搜尋

【市場小姐有話兒 – 打風唱歌】

【市場小姐有話兒 – 打風唱歌】




市場小姐:蘇拉颱風襲港,打完一場風、放左日風假,天氣同個人都精神爽利好多。


佛系男:有假放當然好啦,只要有假放,我又唔介意畀網民鬧係垃圾、失敗者呀。懶惰係人之常情,同食色性也一樣。


市場小姐:不過今次個風又好似無想像中咁勁。


佛系男:天文台又要受罪,掛風又鬧唔掛風又鬧。然後又會畀人攞黎做題目,點解唔開多一日市做多一日生意,甚至半日都好丫。


市場小姐:係呀,新聞話呀,幾日風假停市香港就損失十幾億印花稅,仲有舖頭寫字樓停工停業呢,損失嘅生意、利得稅就更多啦。


佛系男:咁擔心天然災禍令到無生意做,不如擔心競爭力不如人啦。香港開埠咁多年,幾時有擔心過一年打幾日風、落幾日雨就令到店舖要關門大吉?


市場小姐:又係wor,咁點解咁多年無講而家黎講?


佛系男:最重要就梗係因為香港競爭力下跌啦,你應該有睇到話周末北上港人人數,超越南下自遊行人數?香港太單一,性價比又低,唔只係消費、飲食,金融業以至各行各業都有呢個趨勢,屙屎唔出就瀨地硬,唔通認自己失敗咩?咪唯有去責怪打風落雨囉。其次,可能你無留意,近期重提打風停市呢個話題的是中共媒體社評,而家阿爺出到聲話你哋香港人嬌生慣養呀,本地應聲蟲就自然湧出來摻和啦,改制前要先製造noise架麻,過幾個月喇,政府就可以話係為左反映民意。哈!


市場小姐:咁打風又真係少左生意做嘅,你咪話本地啲二三線券行無生意?咁做多兩日都好過無丫。


佛系男:你覺得打風開市可以多幾多生意?分分鐘賺埋都唔夠畀額外的成本呀。員工搭車、保險、打風加班費、膳食安排等等。所以,打風唔可以停市,絕對唔關生意、稅收的事,主要都係阿爺希望香港跟隨內地政策步調。


市場小姐:阿爺咁多希望,我哋邊做得哂呀?


佛系男:唔駛做哂架,「似」就得。


市場小姐:點似法?


佛系男:將呢度搞到符合國情就可以啦!


市場小姐:例如?


佛系男:例如唱歌啦,搞下聯誼活動啦!近日全城熱門話題之一,班立法會議員搞左個「立會好聲音」活動,以前邊有啲咁嘅嘢?肯定係「學」番嚟,跟邊個學呢? 係香港搞到最多呢類活動嘅,一般都係啲中資企業,尤其係果啲做又三十六唔做又三十六的央企,每年搞唔少聯誼活動,歌唱比賽、運動會、護旗、年歡,咩形式都有。


市場小姐:點解班議員要學佢哋呢?


佛系男:第一,文化喜好係會傳染,你想埋堆就自然會模仿對方。第二,反映香港政界而家個普遍心態都係做又三十六唔做又三十六囉,好似啲中資企業咁,最重要的工作是「匯報工作」和取悅上意。


市場小姐:咁香港未來會變成點…


佛系男:優材治港!一片光明!打風唱歌!


131 次查看0 則留言

Comments


bottom of page