東方漁村回歸祖國已經25年，統計一下幾任特首上任後恒指的表現，林太就如上任時講自己非常打得一樣，贏盡前任行政長官，截至昨日計，林太上任後恒指跌幅19%居首（倒數計），反而曾成為階下囚的曾先生在任期間恒指升幅36.5%，助長了貧富懸殊；至卡董伯伯在任期恒指跌一成，亞洲金融風暴麻，非戰之罪；同宗的梁特首在任期間恒指升幅30%，果然是一屆商人，滿身銅腥！
恒指昨日跌穿2020年3月低位21,139點，係自1997年以來第二次，亦係香港有股市開埠以來第二次出現跌穿上一次熊市低位，三十年一遇的市況，市盈率跌穿10倍，又是難得一遇；無獨有偶，統計一下，原來2007年以後，幾次港股低位反彈都在3月發生。噫！？而家米3月！
Ms Market問：「你話港股平，都講左幾個月，聽你講都買到窮啦！」
佛系男回答：「條數的確係咁計！」恒指平均市盈率介乎9至25倍，好樂觀咁計，就係德銀年頭的37000點，但東方漁村有鵝姐的管治，仲邊有可能，最樂觀應該介乎9至18倍；昨日一跌，已經是10倍樓下，19xxx點已經係非常。咁係米代表會升呢？當然唔係。但理性分析的人都以史為鑒，只能夠講，從歷史角度而言，長期回報率非常可觀，但人心叵測，股市都從人心變化，回報率也可以由「非常可觀」，進一步變成「極端可觀」。
但正如本欄已經重複幾期，當今之世係「百年不遇之大變局」，咩都有可能發生，繼佛系男誇張話油價會見500美元，昨日又國為俄烏戰亂抽升一成至130美元。當今世道，大家愈以為無可能的事愈是會發生，所以均衡投資組合非常重要。本人為例，疫情相關股、商品ETF、國企必需服務股，有效降低跌市風險。
昨日有佛系信徒突然自省，原來自己在3萬點高位入貨時心情無乜擔心，反而近日低位再跌的心至包袱更大。其實每位投資者都會遇上相似感受，氣氛好無視downside risk，氣氛差無限放大downside risk。要逆向思考，起碼要做到避免以上心態。
平貨一街都係，呢個時候有銀彈、有信心，就可以有高回報。睇番歷史，3月低位後反彈已出現多次。除左2020年3月的21,139、上一次是2016年3月的18,278、再上一次係2009年金融海嘯後回升起點又係3月。咁岩，今個3月估值又處歷史低位 。
時間點都係巧合，不過從估值水平及市場氣氛衡量，即如Howard S. Marks 所講 “today’s climate should lead to many attractive entry points.” 原來Oaktree已布置內房債部署，你呢？
如大家在投資及理財上遇到疑難，歡迎大家到佛系股評FB專頁留言或私訊發問：https://www.facebook.com/Buddha.Stock/
梁樹德
筆者先後修畢哲學、心理學、經濟學、企業管治和工商管理等碩士課程，在證券分析、企業戰略計劃、投資者關係工作及財富管理等方面有豐富經驗。在亂世末法的此岸，奉經論典籍為圭臬，心若浮沉，淺笑安然。筆者是證監會持牌人。
(編按:《佛系股評》將會逢周二市前上載於信報網站)