【市場小姐有話兒 – 人算不如天算】
市場小姐：長實油塘樓盤「親海駅」大特賣呀，好似好抵咁，不如我地又去湊下熱鬧丫！
佛系男：你覺得好抵咩？
市場小姐：萬五蚊尺都唔駛呀，咁都唔抵？
佛系男：近廿年，香港人已經將兩萬蚊一尺的市區樓當成常態。但風水輪流轉，李超人都要錢唔要貨時，我地啲小市民憑咩去接佢貨？
市場小姐：車，李嘉誠都退休啦！同埋，都不知幾多人去排隊買呀！
佛系男：香港人好精、好識計數，呢個價平過同區二手，就梗係無執輸。但佢地唔諗到，李澤鉅計數更精、更準、更狠。你試想，親海駅地盤連補地價成本八千零蚊一尺，加上每尺約五至六千蚊的建築成本，每尺總成本已經萬三蚊，仲有融資成本呢？突然大降價，仲要提供埋按揭優惠，真係你肯買就得啦，開巷有話，咁大隻蛤乸隨街跳？
市場小姐：咁點解發展商無錢賺都想出貨？
佛系男：咁就肯定唔會無錢賺既，香港的建築成本稱冠全球，某程度都係官商攜手擬造出來的現象。點都好啦，長實減價賣樓，證明計數好叻的李大少認為當下現金為皇。而且，幾年後可能會比今日更難睇。
市場小姐：點難睇法？
佛系男：第一，樓價要向下，源頭在於政府要改變香港行之以久的高地價政策，麵粉價降，麵包價遲早都會跟隨，只係有時差咁解。你諗下，早前西環賣地，地價成本只是七千蚊尺，咁四年後起好賣樓時，樓價好大可能在一萬四千蚊左右。雖然係西環，但點都叫做港島丫，四年後的西環新盤價比今天的油塘價更低，你會點揀？發展商的角度，不如平啲賣現貨，套現來用低價買新地皮好過啦。第二，香港有七成住宅物業已經供斷，呢班人平均年齡都大，又唔等錢使，可能連賣樓的意欲都無。但四年後，新樓供應大增，就會影響到其餘三成未供完樓的業主喇。
市場小姐：咁買樓會升值架麻！
佛系男：無錯呀，但一個地方資產升值係有條件架。先唔好講樓價跌，即使樓價唔跌，但其實樓宇係有折舊架。香港樓價長期升值，係幾代人累積而成的常態，但有冇可能呢個常態會改變呢？日本為例，你知唔知幾多日本舊樓唔使錢都無人要？當然，同當地稅制、法例都有關係既。不過，你要明白，香港以外，或者，華人社會以外，買樓絕對唔係必需，樓價升都唔係必然。有冇可能下幾代人的想法會轉變呢？又如果，未來某一天香港樓市變得有價無市又會點？歷史係會循環架。
市場小姐：咁又係，李居明近排話呀，踏入九運難靠買樓發達。
佛系男：呃…咁李居明都係姓李既…